ҰСТАЗДЫ СЫЙЛАУ - БІЛІМ АЛУШЫНЫҢ МІНДЕТТІ АМАЛДАРЫНЫҢ БІРІ

Жарық дүниенің есігін ашып, ес кіре бастағаннан бастап әр адам дүниені танып білуге талпынады. Сұрақ қойып, жауап алғысы келеді. Осы жолда ол бір адамға ерекше қарыздар. Ол- ұстаз!

Шәкірттің ұстазға деген махаббаты – оны құрметтеуі, қызметінде болу сияқты істерден білінеді. Ұстазды сыйлау - білім алушының міндетті амалдарының бірі. Бойында бекзаттығы бар кісі әмірші болса да, төрт нәрсені жасауға арланбайды: әкесі шақыртса, орнынан тұрады; ұстазына қызмет көрсетеді; білгенін сұрап алады; қонағын құрметтеп күте біледі. 

Ұстаздың уақытпен санаспай жасаған адал еңбегін оның алдында қанша қызмет етсең де қайтару мүмкін емес. Менің алғашқы ұстазым Анипа апай еңбек еткен ұзақ жылдар ішінде қаншама шәкірттердің бойына қажетті дағдыларды сапалы сіңіріп, жалпыадамзаттық құндылықтар негізінде жан-жақты етіп тәрбиелей алды. Бүгін алғашқы ұстазымның еңбегі еленіп, өзі қызмет еткен білім ордасында апайымның атынан оқу кабинеті ашылды.  

Жаңадан ашылған кабинет қажетті құралдармен жабдықталған. Кабинет төрінен бастауыш пәндеріне  байланысты қабырға стендтері орын алды. Білім алушыларды жігерлендіретін қанатты, нақыл сөздер, балалар жазушыларының  шығармалары мен бастауыш оқушыларына арналған кітаптар сөреге қойылды.